તાલીમ દરમિયાનની બે રચનાઓ
(૧) અમે આ ચાલ્યા
તમે કહો તે આદેશ લઈને - અમે આ ચાલ્યા,
તમે કહો તે વેશ પહેરીને - અમે આ ચાલ્યા.
મૂડ નથી તોય કરી દાહિને મૂડ- અમે આ ચાલ્યા,
મર્દ છીએ તોય કરી પીછે મૂડ- અમે આ ચાલ્યા.
ગિરનાર-દાતાર-જંગલ નીરખીને- અમે આ ચાલ્યા,
સાથે છે પ્રકૃતિ મનોમન હરખીને- અમે આ ચાલ્યા.
વાતવાતમાં સાંભળી લઈને ગાળ- અમે આ ચાલ્યા,
તમે કહો ત્યારે કપાવી વાળ - અમે આ ચાલ્યા.
જેવુ-તેવું જમીને કરવા દાવ - અમે આ ચાલ્યા,
ન થાય તો રાજીનામું લાવ - અમે આ ચાલ્યા.
તમે કહો તે જી - હજૂર - અમે આ ચાલ્યા,
થાય રજાઓ નામંજૂર - (તો) અમે આ ચાલ્યા.
નિર્દોષ ના દંડાય લઈને શીખ - અમે આ ચાલ્યા,
પછી આપે સજા સૌને ભીખ - અમે આ ચાલ્યા.
વતનથી દૂર કરવા સેવા માતની - અમે આ ચાલ્યા,
શિખામણ યાદ કરી તાતની - અમે આ ચાલ્યા.
ઘટતા તાલીમના દિવસો ગણીને - અમે આ ચાલ્યા,
PTC ને પરિવાર ગણીને - અમે આ ચાલ્યા.
જે થાય તે જોઈ લઈને - અમે આ ચાલ્યા,
'કશુંક' પોતાનું જમીર ખોઈને - અમે આ ચાલ્યા.
-by ASI સુરેશ ચૌધરી ' કશુંક ' ૪૯૪
(૨) પોલીસની તાલીમ ત્યારે......
મારી રજાઓ જ્યારે નામંજૂર થાય છે ,
પોલીસની તાલીમ ત્યારે સમજાય છે.
જેલ કહી ના શકાય-સુધારગૃહ માનીલો,
કેદીની જિંદગીનો અહેસાસ અનુભવાય છે.
શું હોય આઝાદી ! શું હોય આબાદી ! ,
માત્ર અર્થ એનો વાંચીને સમજાય છે.
કોઈ પર ભરોસો અહી કેવી રીતે મૂકશો,
રોજ દિવસભર એનો મુદ્દો ચર્ચાય છે.
પરેડ-લો ક્લાસ-ગેમ્સ-અને રોલકોલ,
રિક્રૂટના શ્વાસો આની વચ્ચે હંફાય છે.
ચેકરોલ - ઠપકો - દંડ જોવું છું ત્યારે,
શું કહું - મન ખૂબ જ અકળાય છે !
અગર કોઈ બોલે કે આપે સજા મને,
ભવિષ્ય મારું મારી સામે દેખાય છે.
વતનથી દૂર કોઈના માટે અહી નથી આવ્યો,
છતાંય લાગણીઓનો પ્રવાહ કયા રોકાય છે.
સિસ્ટમ નથી સુધારવી , નથી કોઈને સમજાવવા,
જીવન છે ' કશુંક ' આ તો આમ જ જીવાય છે
-ASI સુરેશ ચૌધરી ' કશુંક ' (૦૫/૧૨/૨૦૨૩)
Comments
Post a Comment
Thank you